浩嵐自白

我叫浩嵐，英文名 Tony，今年7歲，讀小學二年級。我平日喜歡做功課、同爸爸玩「上堂遊戲」、玩電腦和 Wii Game 、睇「有腦 E 班」和「新聞報導」，同埋觀察身邊o既人。 D 大人好得意，每次聽到我講出佢地o既名，或者我講番自己個名出o黎 ，都好開心，讚我叻仔。 D小朋友就多數會問佢地身邊o既大人點解我咁大個仔都要坐「 BB 車」唔自己行，而D大人多數唔識答。其實點解佢地唔問o下我爸爸或者我媽媽呢？我媽媽答呢類問題答到熟晒喇，佢會話：「佢而家未識行，所以要坐車仔o羅。」有一次媽媽同一個姨姨講：「佢有先天病，引致腦痲痺症，所以D手手腳腳郁得冇咁好。」當時我等姨姨走左之後問：「媽咪，我有一個病咩 ？」媽媽話：「係呀，呢個世界人人都有D病 .... 」

婆婆話佢最信西醫，有病一定會請醫生幫手。我都有，細細個開始已經時時探醫生，有時去屯門，有時去九龍或者香港。D醫生好叻，識打電腦，雖然成日見唔同醫生，佢地每次見我，都會問帶我去o既爸爸或者媽媽：「小朋友近來點呀？」咁我爸爸媽媽就會向佢地報告，跟住醫生就打電腦，然後幫我約期下次覆診。冇醫生話過我幾時唔駛覆診，淨係同爸爸媽媽講，我o既病唔會好番，冇退步已經好好。

我唔知道點解醫生話我唔會「好番」，唔通好似發燒之後「變番」之前冇燒咁就叫做「好番」？不過我自細就有人抱抱，出街有人推車車，從來唔識自己行，咁點樣「變番」識行，「好番」呢？哦，唔怪得醫生話我唔會「好番」啦。鄰居婆婆話我爸爸媽媽都咁好人，點解我唔識行咁「慘」。我其實唔知道識得行有幾「好」，所以想像唔到唔識行有幾「慘」，但係而家有爸爸媽媽抱，又可以玩「抬豬仔」，都唔錯遮 ！鄰居婆婆個孫仔大我兩歲，識自己行，不過佢成日話自己「好慘」，個書包好重，好多功課，個樣好似好唔開心咁。唔 … 我明啦！覺得自己好慘o既人會好唔開心，咁，我梗係唔慘啦，因為我同屋企人時時都好開心。

讀幼稚園o個陣，媽媽同我一齊造左一張愛心咭，而家張咭貼o係屋企，咭上面寫住：「開心其實好簡單，幸福亦隨手可得，不在乎擁有多少，只在乎我們如何珍惜和善待自己 / 別人，體諒和包容他們的限制，並把這些限制轉化成生活的動力 ....... 是禍是福 ; 只在一念之差。」媽媽話，人唔會樣樣o野都拿100分，唔係就會好悶，冇得進步，不過上天好公平，因為人人都會有D病，又人人都有D叻嫁。好似爸爸話，有失必有得，我D手仔腳仔仲係BB ，我o既腦袋就好懂事（婆婆話我好懂事），可以為身邊o既人帶來歡樂。我好鍾意同爸爸一齊解決問題，玩拆字、計數；佢好攪笑，成日攪鬼馬。媽媽話我而家好似爸爸，好鬼馬。

爸爸媽媽教我，只要識感恩，明白「唔駛捱肚餓、有屋企、有書讀、有人錫、有能力幫人」已經好幸福，繼續做對社會有益o既事，平常心面對困難，我就自然會遇到善緣，有人幫番我喎 。

又係o既，我就成日遇到好人，有學校o既老師同治療師教我認字、計數、做運動，有醫師姐姐幫我做針炙，有孫教授幫我做舌針，有延力師幫我做氣功推拿，有 Uncle Raymond 帶我地去放生，而家仲有林姨姨同埋 Elton 哥哥幫我做「銅人」（ 07年11月譚輝叔叔o黎香港o既時候，都親自睇過我），令到我手手腳腳叻左、講野又清楚左，連劉老師都話我「明顯主動左」（ 07年7 月，佢當時未知我已經做左「銅人」兩個月）。今年過年時，我同 Uncle Thomas 玩打保齡球（ Wii game ），仲同爸爸一齊打低 Uncle Owen（ Boxing Wii game ），好勁。

而家除左參加「銅人治療班」，參加遠程（電話）治療，媽媽差不多日日都幫我做，多數係我o訓著左o個陣添。做「銅人」唔痛、唔駛食藥，仲好舒服，爸爸媽媽幫我做，佢地都「得氣」。媽媽話，好多小毛病佢而家都可以自己攪番掂，我之前試過發燒，媽媽夜晚幫我做「銅人」照燈，我o訓醒覺就退晒燒。佢幫婆婆做眼睛（婆婆有白內障初期徵象，我都有幫婆婆敲公仔），做左幾個月，婆婆07年12月覆診見眼科醫生，醫生話佢「無事」，唔駛再番去。之前醫生話「白內障」唔可以醫番好，冇差到已經唔錯（乜咁似我個病o既？），而家婆婆打麻雀唔駛戴眼鏡。

如果多D有需要o既人知道有「銅人療法」，試o下做，勤力D ，好似我咁，一路進步，咁就算有「醫生話唔識醫番好」o既病，都可以有希望。

我o既新年願望，係人人有希望，個個身體好！

浩嵐

[ 媽媽代行 ]

2008 年 2 月

回到主頁